Eusko Jaurlaritzaren, Gipuzkoako Foru Aldundiaren eta Irungo Udalaren aurrekontu-konpromisoari esker, proiektuak aurrera egiten jarraitzen du
Irungo EAJ-PNVk erakundeen arteko elkarrizketaren aldeko apustua egiten du, alkatetzaren konfrontazio- eta biktimismo-estrategiaren aurrean
Txenperenea proiektua errealitate bihurtzeko lehen urrats zehatzak ematen hasi da. Azkenaldian ematen ari diren aurrerapausoak hiru erakunde inplikatuen arteko lankidetza eta harreman instituzionalaren – Eusko Jaurlaritza, Gipuzkoako Foru Aldundia eta Irungo Udalaren- emaitza zuzena dira. Irungo EAJ-PNVk sustatzen dituen erakundeen arteko harremanen ondorio dira, eta alderdi jeltzaleak erakundeetan duen presentziatik eta Udal gobernuan duen erantzukizunetik defendatzen eta bultzatzen duen lan egiteko moduaren isla dira.
Ildo horretan, hiru erakundeen 2027ko aurrekontuek Txenpereneako kirol-instalazioetan aurrera egiteko diru-partidak jasotzen dituzte. Eusko Jaurlaritzak bi milioi eurotik gorako ekarpen plurianuala txertatu du, Gipuzkoako Foru Aldundiak 4,5 milioi euroko inbertsioa aurreikusi du, eta Irungo Udalak bere aurrekontu-konpromisoari eutsi dio. Gainera, Udal gobernuak asteazken honetan proiektuaren idazketa kontratatzeko prozedura onartu du. Administrazio-urrats berri horrek jarduketaren definizio teknikoan aurrera egitea eta haren garapena zehazten jarraitzea ahalbidetuko du.
Irungo EAJ-PNVk deitoratu egiten du Cristina Laborda Irungo alkatearen adierazpen biktimistak behin eta berriz entzun behar izatea, proiektuak hirira iristen ez direla salatuz. Txenperenea horren adibide argia da eta politika egiteko bi modu daudela erakusten du. Batetik, urteak eman daitezke beste erakundeen inplikazio falta salatzen eta proiektuaren “porrotaren” erantzukizun osoa haiei egozten. Bestetik, eseri, hitz egin, negoziatu, lan egin eta koordinatu daiteke, erakundeek baliabideak konprometitu arte. Alkateak, eta haren aurretik urte luzez sozialisten gobernuek, harreman horiek sustatzeko aukera izan dute, baita beren alderdiak gobernatzen dituen erakundeekin ere. Hala ere, nahiago izan dute etengabeko liskarraren eta erreklamazioaren estrategian kokatu, horrela Udalari dagozkion kudeaketa-lanen geldotasuna justifikatzeko. Irungo EAJ-PNVk, aldiz, Eusko Jaurlaritzarekin eta Gipuzkoako Foru Aldundiarekin zubiak eraikitzearen alde egin du, eta horren emaitza dira gaur egun Txenperenean ematen ari diren aurrerapausoak. Ez dira hitzak, ezta promesak ere, egitateak dira.
Irungo EAJ-PNVren ustez, funtsezkoa da lankidetza-dinamika horri eustea, Txenperenearen garapena bermatzeko eta Plaiaundiko kirol-instalazioak lekualdatzea errealitate bihurtzeko. Horrela, kirol-kluben beharrei erantzungo zaie eta espazio horren ingurumen-lehengoratzean aurrera egingo da. Irunek harremanak eraikiko dituen, aliatuak bilatuko dituen eta hiriarentzat konpromisoak lortuko dituen alkatetza behar du. Talde jeltzaleak norabide horretan lanean jarraituko du, proiektu garrantzitsuak elkarrizketaren, akordioen eta elkarlanerako borondatearen bidez gauzatzen direlako.
