Maiatzeko Osoko Bilkuran hainbat proiektu eztabaidatu eta onartu dira, eta horietako hiruk Irungo EAJ-PNVk Irungo Udalean kudeatzen dituen arloekin zerikusia dute:
Aho batez onartu da Gizarte Ongizateko arloak aurkeztutako Adikzioen Prebentziorako V. Plana, 2020an onartutako dokumentua hobetzen duena. Programa hori 2026tik 2030era bitartean ezarriko da, eta Irungo gizartearen kontsumoa, ohiturak eta bizitzeko modua hartzen ditu kontuan. Programaren helburua da herritarren osasun integrala bermatzea, mendekotasuna eragiten duten substantzien eta jokabideen kontsumoa saihestuz edo murriztuz eta teknologia digitalen gehiegizko erabileran eraginez.
V. Plan honek hainbat berritasun dakartza aurreko dokumentuarekin alderatuta, besteak beste, ludopatiaren arazoari eskolan eta komunitatean heltzea eta komunitate-eremuko prebentzioa indartzea. Gainera, beste erakunde batzuekin (hala nola, adikzioen arloko elkarteekin, Osakidetzarekin eta Eusko Jaurlaritzako Osasun Publikoko Sailarekin) izandako lankidetza azpimarratu du.
Josu Iguiñiz, Gizarte Ongizateko ordezkari jeltzalea: “Garrantzi handiko plana da; izan ere, pertsona askok kontsumo adiktiboak dituzte, eta gure arduretako bat kontsumo ohitura aldatzeko beharrezkoak diren tresnak informatzea, prebenitzea eta jartzea da, kontsumo horiek ekar ditzaketen ondorioei buruz Irungo gizartea osatzen dugun guztioi”.
Emakumeen aurkako indarkeria matxistaren arloko erakundeen arteko arreta- eta koordinazio-protokoloa aldatzea:
Aho batez onartu da Emakumeen aurkako Indarkeria Matxistaren arloko Erakundeen arteko Arreta eta Koordinaziorako Protokoloaren aldaketa, Maite Cortina Berdintasun eta LGTBIQ+ Eskubideen ordezkari jeltzaleak aurkeztua. Aldaketa puntual bat da, nomenklaturak eguneratzeko, Euskal Autonomia Erkidegoko Auzitegi Nagusiak apirilean onartutako indarreko eskumen-izendapenarekin bat datozenak, eta bere horretan geratzen da talde politiko guztiek otsailean egindako Osoko Bilkuran onartutako dokumentuaren funtsa. Beraz, segurtasun juridiko handiagoa, zehaztasun instituzional handiagoa eta Euskal Autonomia Erkidegoko Auzitegi Nagusiak ezarritako esparrura behar bezala egokitzea ematen duen egokitzapen teknikoa da.
Datozen hiru urteetarako Euskara Plan Estrategikoa onartu da, hirian euskararen erabilera sustatzeko hiriko eragile sozial eta politikoek hilabete luzez landutako plana. Eusko Jaurlaritzak Herri Administrazioetan 2024-2034 aldirako diseinatu duen Aroa Plana Irunen lurreratu da, eta hainbat ardatz ditu: gobernantza, jarrera eta motibazioa, ezagutza eta trebetasuna, eta, azkenik, erabilera eta berritasuna.
Dokumentuak 67 programa biltzen ditu guztira: horietako batzuk Irungo Udalak azken urteotan martxan izan dituen programak dira, eta beste batzuk, aldiz, berriak dira eta datozen bost urteetan pixkanaka martxan jartzea aurreikusten da. Azpimarratu behar da, halaber, planaren dokumentu hau Irungo Udalak Euskararen Aholku Batzordearen bitartez garatutako parte-hartze prozesuaren edukiarekin osatu dela.
Plan Estrategiko honek bat egiten du 2003an aho batez onartutako Euskara Ordenantzarekin. Josu Iguiñiz Euskararen ordezkari jeltzaleak adierazi duenez, “Ordenantza dugu, Europaren babesa dugu, orain Plan Estrategikoa dugu eta helburu batzuk ditugu betetzeko. Orain guztion artean paperetik errealitatera pasatzeko txanda da, euskara baita herritar guztien altxorra”.
Gainera, 2026ko aurrekonturako kredituak aldatzea proposatu da. Aurrekontu horretan, 5 milioi euro baino gehiago sartzea onartu da udal-kontuetan, eta horietatik 3 milioi euro baino gehiago Irungo EAJ-PNVk kudeatzen dituen arloetako proiektu eta programei dagozkie. Jeltzaleen bozeramaile eta bigarren alkateorde Gorka Álvarezek Euzko Alderdi Jeltzaleak Udal Gobernuan egindako lana azpimarratu du: “Laguntza emango genuela eta Irunen alde lanean jarraituko genuela esan genuen. Eta horrela ari gara lanean kudeatzen ditugun arloetan eta Udal talde osoan”.
Irungo EAJ-PNVko ordezkariek beren arloetan kredituen aldaketa honekin burutuko dituzten gaien artean honako hauek nabarmentzen dira: hiriko gizarte-zentroetan zerbitzuak hobetzea, adinekoei arreta emateko eskaintza handitzea, LGTBIQ+ komunitatearen sentsibilizazioa, euskararen erabilera bultzatzeko programak eta planak, eta herritarren egunerokotasuna hobetzea, Irun hiri atseginagoa eta seguruagoa izan dadin kaleen eta plazen hobekuntza, argiztapena, irisgarritasuna, udal-instalazioak, aparkalekua eta segurtasuna ere nabarmentzen ditu kreditu aldaketa honek.
Gorka Álvarezek adierazi duenez, “asko dago egiteko, eta egingo dugu, Irunen alde lan eginez. Hori izan zen Koalizio Gobernu honetan sartzeko gure arrazoia eta hori da gure helburua udal lanaren egunerokotasunean: Irun hiri hobea izatea”.
Horrekin guztiarekin batera, Irungo Udalak Real Unión Club, S.A.D.rekiko lankidetza-hitzarmena aldatzea onartu du, Stadium Galen erabilerari eta ustiapenari dagokienez, eta Irungo Emisio Baxuen Gunea sortzeari eta arautzeari buruzko hasierako ordenantza onartu da. Irungo EAJ-PNVk adierazi du, Gorka Álvarez bozeramailearen bitartez, neurri hori aplikatzea ez dela “kapritxo bat. Udal talde honek ere zalantza asko izan ditu, ez dugu ukatzen. Lehenik eta behin, Irun oso hiri zaila delako mugikortasunerako, guztiok ezagutzen ditugun faktore geografiko eta urbanistikoengatik. Baina, era berean, kontraesankorra zen airearen kalitatea urte osoan ona edo oso ona izatea eta Emisio Baxuko Zona bat aplikatu behar izatea. Baina legea argia da”.
